28.03.2024

Түбэҕэ библиотека күнэ бэлиэтэннэ.

Оҕону кыра эрдэҕиттэн кинигэни ааҕарга, таптыырга, кинигэҕэ сыһыарарга үөрэтии барыбыт сүрүн сыала буолар. Онно сүрүн оруолу төрөппут, оскуола уонна библиотека ылар. Ааҕыы хаһан да өлбөт-сүппэт дьарык буолар. Билиҥҥи кэмнэ төһө да аныгы технологиялар, информация араас көрүҥэ баарын да иһин, кинигэ куруук баар буолуо.

Библиотека — билии-көрүү храма. Россия үрдүнэн библиотека күнүгэр аналлаах Түбэ модельнай библиотекатыгар оҕолорго аналлаах тэрээһиннэр буоллулар. Ол курдук, бастатан туран, маҥнайгы республика үрдүнэн ыытыллыбыт  «Кинигэ Күүһэ» диэн акцияҕа кыттыыны ыллыбыт. Бу акция сүрүн сыалынан бэйэни салайыныы салайааччылара, специалистара оҕолорго кыра сылдьан сөбүлээн аахпыт кинигэлэрин дорҕоонноохтук ааҕан, билиһиннэрэн ааҕыыны көҕүлээһиннэрэ, библиотека ыытар үлэтигэр болҕомтолорун ууруулара буолар. Түбэ орто оскуолатын 1-6 үөрэнээччилэригэр анаан «Түбэ нэһилиэгэ» МТ баһылыга Константин Константинович Федоров Р.Киплинг «Маугли» айымньытын ааҕан иһитиннэрдэ уонна санааларын аһаҕастык уллэһиннэ, оҕолор болҕомтолорун тардан кэпсээтэ, боппуруостарга эппиэтээтэ.

Маны сэргэ, уһуйаан иитиллээччилэрэ библиотекаҕа ыалдьыттаатылар, кинигэни кытта алтыһан, билсэн, оонньоон, кинигэ уларсан бардылар. Кинигэ геройдара — өйдөөх Куоска уонна Билбэтчэй, Кутуйах библиотека, кинигэлэр тустарынан олус интэриэһинэйдик, сонуннук кэпсээн оҕолор болҕомтолорун тартылар.

Салгыы I-VI кылаастарга «Кладоискатели» велоквест оонньуу ыытылынна. Оҕолор араас сорудахтары толорон, оонньоон, карта хомуйан ыйыллыбыт маршрутунан айаннаан библиотекаҕа кэллилэр уонна бутэһигэр минньигэс кылааттаах сундуук буланнар үөруулэрэ уксээтэ. Бу күн библиотекаҕа муора тематыгар аналлаах кинигэ быыстапката, ааҕыыга аналлаах фотозона туран, оҕолор сэргээн, хаартыскаҕа туһэн тарҕастылар.

Юлия Иванова, Түбэ модельнай библиотекатын сэбиэдиссэйэ

Мы используем cookie-файлы для наилучшего представления нашего сайта. Продолжая использовать этот сайт, вы соглашаетесь с использованием cookie-файлов.
Принять