Куорсуннааҕы кытта истиҥ көрсүһүү

Быйыл 2018 сыл – Саха сирин уһулуччулаах судаарыстыбаннай деятелэ, суруйааччы, учуонай, бөлүһүөк  П.А.Ойуунускай төрөөбүтэ 125 сыла. Бу кэрэ-бэлиэ юбилейдаах даатаны көрсө «Библионочь-2018» акция чэрчитинэн Н.М.Рыкунов аатынан Намнааҕы киин библиотека ааҕар саалатыгар  «Айар кут» литературнай көстүүнэй ааҕааччылары, ыалдьыттары муста. Литературнай тэрээһин бочуоттаах ыалдьыттарынан суруйааччы, СӨ үтүөлээх артыыһа, Россия суруйааччыларын Союһун чилиэнэ, П.Ойуунускай аатынан государственнай премия лауреата, Таатта улууһун бочуоттаах олохтооҕо Елена Васильевна Слепцова-Куорсуннаах,  Мусоргскай аатынан Ураллааҕы  государственнай консерватория выпускниктара, талааннаах артыыстар Елена Старостина-Хотун Арылы уонна биир дойдулаахпыт Дмитрий Барабанов-Дьырылыатта буоллулар.

Көрсүһүүгэ кэлбит ааҕааччыларга  Елена Васильевна улуу Ойуунускай олоҕун, айар үлэтин туһунан бэрт интэриэһинэйдик, хомоҕой тылынан киһи истэ эрэ олоруох курдук  кэпсээтэ, хоһооннору аахта. Дьон-сэргэ  үгүс элбэх чахчылары биллилэр, бэйэлэригэр Ойуунускай туһунан саҥа арыйыылары оҥордулар. Биэчэри хатыламмат кэрэ куоластарынан ырыаһыттар Елена Старостина-Хотун Арылы, Дмитрий Барабанов-Дьырылыатта киэргэттилэр.

П.Ойуунускай  айымньыларын И.Д.Винокуров — Чаҕылҕан аатынан Намнааҕы алын сүһүөх оскуола 3 кылааһын уерэнээччилэрэ (салайааччы Иванова Е.К.), Н.С.Охлопков аатынан улуустааҕы гимназия үөрэнээччилэрэ (салайааччы Уваровская С.П.), «Иэйии” ветераннар ансаамбылларын активнай кыттыылааҕа, сцена ветерана  Ольга Николаевна Ядрихинская, Хамаҕатта саха-француз лицей 10 кылааһын үөрэнээччитэ Аэлита Лыткина уус ураннык аахтылар. Саха Республикатын суруйааччыларын союһун чилиэнэ, улуустааҕы  “Отуу уота” литературнай түмсүү чилиэнэ, Намнааҕы педколледж музейын сэбиэдиссэйэ Байанаева Прасковья Дмитриевна Былатыан Ойуунускай уонна Махсыым Омуоһап доҕордоһууларын туһунан сиһилии кэпсээтэ.

Нам сиригэр олохсуйбут Таатта дьонун-сэргэтин аатыттан Куорсуннаахха эҕэрдэ тылы Намнааҕы педколледж преподавателэ Осипова Елена Дмитриевна тиэртэ.

Түмүккэ Елена Васильевна ааҕааччылар ыйытыыларыгар хоруйдаата, автограф биэрдэ, хаартыскаҕа түһүү буолла.

Илгэлээх сайыны көрсө литература эйгэтигэр истиҥ көрсүһүүнү бэлэхтээбит күндү ыалдьыттарбытыгар ааҕааччылар дириҥ махталларын, сүгүрүйүүлэрин тиэртилэр.

Гоголева Р.А., методист