Автор: «Отуу уота» уран тыл оһуордаах ыһыаҕар
От ыйын 14 күнүгэр талааннаах суруйааччы, общественнай, государственнай деятель, П.А.Ойуунускай аатынан Государственнай бириэмийэ хаһаайына, СССР Суруйааччыларын сойууһун чилиэнэ Сергей Степанович Васильев – Борогонскай төрөөбүтэ 110 сылыгар уонна «Улуу Ильмень» айымньыта суруллубута 50 сылыгар аналлаах суруйааччы төрөөбүт Суотту нэһилиэгин, «Доҕордоһуу» музейыгар киэҥ программалаах «Литературнай пикник» — Уран тыл оһуордаах ыһыаҕа 3 –с төгүлүн буолан ааста. Бу күрэҕи СР Национальнай библиотекатын кыраайы үөрэтэр салаата уонна Уус Алдан улууһун С.Васильев – Борогонскай аатын сүгэр Бороҕон киин библиотеката иилээн — саҕалаан ыыттылар. Республиканскай күрэххэ Горнай, Мэҥэ Хаҥалас, Нам, Хаҥалас, Таатта, Кэбээйи, Үөһээ Бүлүү, Сунтаар улуустарыттан уонна Дьокуускай куораттан “Айар кут” литературнай түмсүүттэн кэлэн кыттыыны ыллылар. Кэлбит ыалдьыттарга эҕэрдэ алгыстаах тылларын тиэртилэр Ил Түмэн аппараатын үлэһитэ Лена Семеновна Заболоцкая, Уус Алдан улууһун культура управлениетын начальнигын солбуйааччыта Лена Семеновна Павлова, “Бороҕон нэһилиэгэ” МТ баһылыгын солбуйааччыта Владимир Васильевич Алексеев, “Доҕордоһуу” музейын генеральнай дириэктэрэ, Өксөкүлээх Өлөксөй сиэнэ Раиса Реасовна Кулаковская, саха народнай суруйааччыта Иван Васильевич Мигалкин, Национальнай библиотека үлэһиттэрэ: дириэктэри солбуйааччы Мария Витальевна Андреева, бу бырайыак ааптара Сардаана Васильевна Алексеева, кыраайы үөрэтэр салаа сэбиэдиссэйэ Лариса Иннокентьевна Кычкина о.д.а. Саха норуотун улуу киһитэ, патриота Дмитрий Кононович Сивцев – Суорун Омоллоон Саха сирэ Россия састаабыгар киирбит суолтатын история чахчыларынан көрдөрөр туһуттан аһаҕас халлаан анныгар тэрийбит “Доҕордоһуу” музейын сөҕө — махтайа көрдүбүт.
Салгыы кэпсээнньиттэр, хоһоонньуттар, тылбаасчыттар күөн күрэстэрэ үс түһүмэҕинэн ыытылынна. Дьүүллүүр сүбэҕэ учуонайдар, литературоведтар, биллиилээх суруйааччылар үлэлээтилэр.
Бу республиканскай күрэххэ биһиги улууспутуттан «Отуу уота» литературнай түмсүү кыттыыны ылла. “Мин суруйааччыбын” — кэпсээн суруйуутугар Пестрякова Лидия Егоровна – Үүнэр кыыһа, «Поэзия түһүлгэтэ» хоһоон айыытын күрэҕэр Кычкина Мария Иннокентьевна – Ситим Кут, Иванов Виталий Саввич, Пестрякова Лидия Егоровна – Үүнэр кыыһа уонна нууччалыыттан сахалыы тылбааска Иванов Виталий Саввич кыттан, бэйэлэрин кыахтарын холонон көрдүлэр. Түмүккэ хоһоон айыытын күрэҕэр Лидия Егоровна уонна Виталий Саввич биһирэбил бириискэ тигистилэр. “Отуу уота” литературнай түмсүү салайааччыта Александр Григорьевич Дунаев кэлбит ыалдьыттары эҕэрдэлээн туран үлэтин билиһиннэрдэ, М.К.Аммосов төрөөбүтэ 120 сылынан бэлиэлэри литературнай түмсүүлэр салайааччыларыгар туттарда. Үбүлүөйдээх суруйааччыларбытын кэпсиир кинигэ быыстапкатын туруоран дьоҥҥо – сэргэҕэ билиһиннэрдибит.
Ити курдук куйааһынан илгийбит самаан сайыммытыгар айылҕабыт барахсан силигилээн тупсан турар кэмигэр бу күрэххэ кыттан, хомоҕой тыллаах хоһооннору, кэрэ кэпсээннэри истэн–сэргээн, элбэҕи билэн–көрөн дуоһуйа сынньанан кэллибит.
Дьяконова Раиса Николаевна
